বাংলাদেশত ধৰ্মীয় সংখ্যালঘুৰ ওপৰত চলি থকা নিৰ্যাতনক লৈ গভীৰ উদ্বেগ প্ৰকাশ কৰিছে নিউয়ৰ্ক ৰাজ্যিক বিধানসভাৰ সদস্যা জেনিফাৰ ৰাজকুমাৰে। শেহতীয়াকৈ বাংলাদেশৰ ময়মনসিংহত দিপু চন্দ্ৰ দাস নামৰ এজন ২৫ বছৰীয়া হিন্দু যুৱকক উন্মত্ত বাংলাদেশী মুছলমানে মৰিয়াই মৰিয়াই জীৱন্তে জ্বলাই হত্যা কৰা ঘটনাক তেওঁ এক “ভয়াবহ অপৰাধ” বুলি অভিহিত কৰে।
এক বিবৃতিত ৰাজকুমাৰে কয় যে এই ঘটনা বাংলাদেশত চলি থকা ধৰ্মীয় নিৰ্যাতন আৰু লক্ষ্যভিত্তিক হিংসাৰ এক দুৰ্ভাগ্যজনক অংশ। তেওঁ উল্লেখ কৰে যে আগষ্ট ২০২৪-ৰ পৰা জুলাই ২০২৫-ৰ ভিতৰত সংখ্যালঘুৰ বিৰুদ্ধে ২,৪০০-তকৈ অধিক হিংসাত্মক ঘটনা সংঘটিত হৈছে আৰু ১৫০ তকৈ অধিক মন্দিৰ ভাঙি পেলোৱা হৈছে।
বিধায়িকা গৰাকীয়ে কয়, “কুইন্সৰ পৰা আৰম্ভ কৰি বিশ্বৰ বিভিন্ন প্ৰান্তত থকা আমি সকলোৱে বাংলাদেশৰ হিন্দুসকলৰ যন্ত্ৰণা আৰু অনিশ্চয়তা অনুভৱ কৰিছো।” তেওঁ বাংলাদেশ চৰকাৰক সংখ্যালঘুসকলৰ সুৰক্ষা নিশ্চিত কৰিবলৈ আৰু মানৱ অধিকাৰ ৰক্ষা কৰিবলৈ আহ্বান জনায়। উল্লেখযোগ্য যে, এই হত্যাকাণ্ডৰ সৈতে জড়িত থকাৰ অভিযোগত ইতিমধ্যে ১২ টাক গ্ৰেপ্তাৰ কৰা হৈছে।
