নেপালত শেহতীয়াভাৱে সংঘটিত হোৱা যুৱপ্ৰজন্মৰ ‘জেন জি’ আন্দোলনে দেশখনৰ অৰ্থনীতিত এক মোক্ষম আঘাত সানিছে। চৰকাৰীভাৱে গঠন কৰা এক তদন্ত সমিতিয়ে দাখিল কৰা প্ৰতিবেদন অনুসৰি, এই আন্দোলনৰ ফলত নেপালত প্ৰায় ৮৪.৪৫ বিলিয়ন (৮,৪৫০ কোটি) নেপালী টকাৰ সা-সম্পত্তি ধ্বংস হৈছে।
প্ৰতিবেদনখনত উল্লেখ কৰা অনুসৰি, এই আন্দোলনত মুঠ ৭৭ জন লোকে প্ৰাণ হেৰুৱাইছে আৰু ২,৪০০ জনতকৈ অধিক লোক আহত হৈছে। ক্ষয়-ক্ষতিৰ সবিশেষ তলত উল্লেখ কৰা হ’ল:
- ভৌতিক আন্তঃগাঁথনি: দেশজুৰি প্ৰায় ২,৬৭১ টা চৰকাৰী আৰু ব্যক্তিগত ভৱন ক্ষতিগ্ৰস্ত হৈছে, যাৰ মূল্য প্ৰায় ৩৯.৩১ বিলিয়ন টকা।
- যান-বাহন: প্ৰায় ১২,৬৫৯ খন যান-বাহন ধ্বংস বা অগ্নিসংযোগ কৰা হৈছে।
প্ৰধানমন্ত্ৰী সুশীলা কাৰ্কীক প্ৰদান কৰা এই প্ৰতিবেদনত উল্লেখ কৰা হৈছে যে ধ্বংস হোৱা আন্তঃগাঁথনিসমূহ পুনৰ নিৰ্মাণ কৰিবলৈ চৰকাৰক অতিৰিক্ত ৩৬.৩০ বিলিয়ন টকাৰ প্ৰয়োজন হ’ব। উল্লেখ্য যে, ছচিয়েল মিডিয়াৰ ওপৰত নিষেধাজ্ঞা আৰু দুৰ্নীতিৰ বিৰুদ্ধে যোৱা ছেপ্টেম্বৰ মাহত আৰম্ভ হোৱা এই জেন জি আন্দোলনে অৱশেষত কে. পি. শৰ্মা অলী চৰকাৰৰ পতন ঘটাইছিল।
