মণিপুৰৰ ইম্ফলত চলি থকা ৰাজ্যৰ সৰ্ববৃহৎ সাংস্কৃতিক অনুষ্ঠান ‘চাংগাই মহোৎসৱ’ৰ (Sangai Festival) সমান্তৰালভাৱে নিৰাপত্তা বাহিনীয়ে উগ্ৰপন্থী বিৰোধী অভিযান তীব্ৰতৰ কৰি তুলিছে। বিভিন্ন দল-সংগঠনে এই মহোৎসৱ বৰ্জন কৰা সত্ত্বেও চৰকাৰে কটকটীয়া নিৰাপত্তাৰ মাজত অনুষ্ঠানটি চলাই নিছে। আজি ইম্ফল পশ্চিম আৰু বিষ্ণুপুৰ জিলাত চলোৱা এক অভিযানত আৰক্ষীয়ে পিএলএ (PLA) আৰু প্ৰিপাক (PREPAK) নামৰ নিষিদ্ধ ঘোষিত সংগঠনৰ ৪ জন সক্ৰিয় সদস্যক গ্ৰেপ্তাৰ কৰিবলৈ সক্ষম হয়।
আনহাতে, ৰাজ্যখনত চলি থকা জাতিগত সংঘাতৰ পৰিপেক্ষিতত একাংশ লোকে মহোৎসৱ অনুষ্ঠিত কৰাৰ বিৰোধিতা কৰিছে। তেওঁলোকৰ মতে, ৰাজ্যত শান্তি ঘূৰি নহা পৰলৈকে এনে উৎসৱ উদযাপন কৰা উচিত নহয়। কিন্তু চৰকাৰে যুক্তি দৰ্শাইছে যে স্থানীয় অৰ্থনীতি আৰু পৰ্যটন উদ্যোগক পুনৰুজ্জীৱিত কৰিবলৈ এই মহোৎসৱৰ প্ৰয়োজনীয়তা আছে। বৰ্তমান ইম্ফলত পৰিস্থিতি শান্তিপূৰ্ণ যদিও উত্তেজনা বিৰাজমান।
