আমেৰিকা যুক্তৰাষ্ট্ৰৰ গৃহ সুৰক্ষা বিভাগে (DHS) গুৱান হেং (Guan Heng) নামৰ এগৰাকী চীনা নাগৰিকক দেশৰ পৰা বহিষ্কাৰ কৰাৰ পৰিকল্পনা আনুষ্ঠানিকভাৱে বাতিল কৰিছে। ৩৮ বছৰীয়া গুৱান হেঙে চীনৰ জিনজিয়াং প্ৰদেশত উইগুৰ মুছলমানসকলৰ ওপৰত চলা অত্যাচাৰ আৰু বন্দী শিবিৰৰ গোপন ভিডিঅ’ প্ৰস্তুত কৰি সমগ্ৰ বিশ্বৰ দৃষ্টি আকৰ্ষণ কৰিছিল।
২০২০ চনত গুৱানে অতি বিপদসংকুলভাৱে জিনজিয়াঙৰ বন্দী শিবিৰসমূহৰ ছবি আৰু ভিডিঅ’ সংগ্ৰহ কৰিছিল। পৰৱৰ্তী সময়ত তেওঁ চীন ত্যাগ কৰি আমেৰিকাত আশ্ৰয় বিচাৰিছিল। শেহতীয়াকৈ তেওঁক অবৈধ প্ৰৱেশৰ অভিযোগত আটক কৰা হৈছিল আৰু উগাণ্ডালৈ প্ৰেৰণ কৰাৰ প্ৰস্তুতি চলোৱা হৈছিল। কিন্তু মানৱ অধিকাৰ কৰ্মী আৰু একাংশ আমেৰিকান সাংসদে ইয়াৰ তীব্ৰ বিৰোধিতা কৰে।
বিৰোধিতাকাৰীসকলৰ মতে, গুৱানক যদি বহিষ্কাৰ কৰা হয়, তেন্তে তেওঁক বেইজিঙে কঠোৰ শাস্তি বিহাৰ পূৰ্ণ সম্ভাৱনা আছে। তেওঁৰ সুৰক্ষাৰ প্ৰতি লক্ষ্য ৰাখি আৰু মানৱীয়তাৰ খাতিৰত আমেৰিকা চৰকাৰে এই সিদ্ধান্ত গ্ৰহণ কৰে। বৰ্তমান তেওঁৰ আশ্ৰয়ৰ আবেদন (Asylum application) পুনৰ বিবেচনা কৰা হ’ব বুলি জানিব পৰা গৈছে।
