তাৰিখ: ২৪ নৱেম্বৰ, ২০২৫
ত্ৰিপুৰাৰ ৰাজ্যিক ৰাজনীতিত পুনৰ সংঘাতৰ সৃষ্টি হৈছে। টিপ্ৰা মথাৰ (Tipra Motha) মুৰব্বী প্ৰদ্যোত কিশোৰ দেৱবৰ্মনে ৰাজ্যখনৰ এজন মন্ত্ৰীৰ বিৰুদ্ধে জনজাতীয় লোকসকলৰ মাজত বিভাজন অনা আৰু হিংসা বিয়পোৱাৰ গুৰুতৰ অভিযোগ উত্থাপন কৰিছে। দেওবাৰে আগৰতলাই অনুষ্ঠিত এক সভাত দেৱবৰ্মনে কয় যে চৰকাৰৰ এই মন্ত্ৰীজনে বিজেপি আৰু টিপ্ৰা মথাৰ মাজত সংঘাত সৃষ্টি কৰিবলৈ পৰিকল্পিতভাৱে কাম কৰি আছে।
তেওঁ সতৰ্ক কৰি দিয়ে যে জনজাতীয় লোকসকলৰ একতা ভংগ কৰাৰ যিকোনো চেষ্টাৰ বিৰুদ্ধে তেওঁৰ দলে কঠোৰ ব্যৱস্থা ল’ব। উল্লেখ্য যে, শেহতীয়াকৈ পশ্চিম ত্ৰিপুৰাৰ কিছু অঞ্চলত বিজেপি আৰু টিপ্ৰা মথাৰ সমৰ্থকৰ মাজত হোৱা সংঘৰ্ষই পৰিস্থিতি উত্তপ্ত কৰি তুলিছিল। প্ৰদ্যোত দেৱবৰ্মনে মুখ্যমন্ত্ৰী ড০ মানিক সাহাকো এই বিষয়ে অৱগত কৰে আৰু ২৭ নৱেম্বৰত আগৰতলাই অনুষ্ঠিত হ’বলগীয়া গণ সমাৱেশত উত্তৰ-পূবৰ আঞ্চলিক দলসমূহক একত্ৰিত কৰাৰ বাবে আহ্বান জনাব বুলি ঘোষণা কৰে।
