চিৰিয়াৰ হোমন চহৰত শুকুৰবাৰৰ নামাজৰ সময়ত এটা মছজিদত সংঘটিত এক শক্তিশালী বোমা বিস্ফোৰণত কমেও ৮ জন লোক নিহত হোৱাৰ লগতে ১৮ জনতকৈও অধিক লোক গুৰুতৰভাৱে আহত হয়। চহৰখনৰ ৱাডি আল-ধাহাব অঞ্চলত অৱস্থিত ইমাম আলি বিন আবি তালিব মছজিদত এই আক্ৰমণ সংঘটিত হয়।
প্ৰত্যক্ষদৰ্শীৰ মতে, মছজিদটোত শুকুৰবাৰৰ নামাজৰ বাবে বহুতো ধৰ্মপ্ৰাণ লোক গোট খাইছিল। তেনে সময়তে মছজিদৰ ভিতৰত থকা এক বিষ্ফোৰক যন্ত্ৰৰ বিস্ফোৰণ ঘটে। এই মছজিদটো মূলত সংখ্যালঘু আলাৱাইট (Alawite) সম্প্ৰদায়ৰ উপাসনা স্থলী।
‘সৰয়া আনছাৰ অল-চুন্নাহ’ নামৰ এটা ইছলামিক চৰমপন্থী গোটে টেলিগ্ৰামযোগে এই আক্ৰমণৰ বাবে নিজকে দায়ী কৰিছে। তেওঁলোকে কয় যে আগন্তুক দিনত এনেধৰণৰ আক্ৰমণ আৰু তীব্ৰতৰ কৰা হ’ব।
ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছে এই আক্ৰমণক তীব্ৰ গৰিহণা দিছে। তেওঁ কয় যে ধৰ্মীয় উপাসনা স্থলীত এনেধৰণৰ আক্ৰমণ মানৱতাৰ পৰিপন্থী। চিৰিয়াৰ অন্তৱৰ্তীকালীন চৰকাৰে এই ঘটনাক দেশখনক অস্থিৰ কৰাৰ এক ষড়যন্ত্ৰ বুলি অভিহিত কৰিছে।
