১৯ নৱেম্বৰ, বোকাখাট
অসমৰ গৌৰৱ কাজিৰঙা ৰাষ্ট্ৰীয় উদ্যানৰ সুৰক্ষাৰ প্ৰতি লক্ষ্য ৰাখি অসম প্ৰদূষণ নিয়ন্ত্ৰণ পৰিষদে (APCB) এক গুৰুত্বপূৰ্ণ পদক্ষেপ গ্ৰহণ কৰিছে। কাজিৰঙাৰ কাষতে অৱস্থিত বোকাখাট পৌৰসভাৰ আৱৰ্জনা পেলোৱা ঠাই আৰু মল-বোকা শোধন কেন্দ্ৰ (Faecal Sludge Treatment Plant – FSTP) ততাতৈয়াকৈ স্থানান্তৰ কৰিবলৈ পৰিষদে নিৰ্দেশনা জাৰি কৰিছে।
APCB-য়ে স্পষ্ট কৰি দিছে যে বোকাখাটৰ এই আৱৰ্জনা কেন্দ্ৰটোৱে কেৱল কাজিৰঙা ৰাষ্ট্ৰীয় উদ্যানৰ পৰিৱেশ তথা বন্যপ্ৰাণীকে নহয়, সমগ্ৰ অঞ্চলটোৰ বাঘ সংৰক্ষিত বনাঞ্চলৰ ওপৰতো প্ৰত্যক্ষভাৱে নেতিবাচক প্ৰভাৱ পেলাইছে। বিশেষকৈ, বাৰিষা কালত আৱৰ্জনাৰ পানী উদ্যানৰ ভিতৰলৈ প্ৰৱেশ কৰাৰ ফলত প্ৰদূষণৰ সৃষ্টি হোৱাৰ লগতে বন্যপ্ৰাণীৰ খাদ্যৰ শৃংখলত বিঘিনি সৃষ্টি হয়।
পৰিষদে বোকাখাট পৌৰসভাক এই আৱৰ্জনা কেন্দ্ৰটো সাত দিনৰ ভিতৰত এক নিৰাপদ আৰু দূৰৱৰ্তী স্থানলৈ স্থানান্তৰ কৰাৰ বাবে কঠোৰ নিৰ্দেশ দিছে। এই সময়সীমাৰ ভিতৰতে পৌৰসভাক স্থানান্তৰৰ ক্ষেত্ৰত গ্ৰহণ কৰা কাৰ্য্য ব্যৱস্থাৰ এক প্ৰতিবেদন APCB-ৰ ওচৰত দাখিল কৰিবলৈ কোৱা হৈছে।
পৰ্যটক আৰু বন্যপ্ৰাণী সংৰক্ষণ কৰ্মীসকলে পৰিষদৰ এই পদক্ষেপক আদৰণি জনাইছে। বৰ্তমান এই স্থানান্তৰ প্ৰক্ৰিয়া কিমান ক্ষিপ্ৰতাৰে সম্পন্ন হয়, সেয়া পৰৱৰ্তী সময়ত লক্ষ্যণীয় হ’ব।
