ছৌদি আৰৱে ছ’চিয়েল মিডিয়াত দেশখনৰ সমালোচনা কৰি পোষ্ট কৰাৰ বাবে আটক কৰি ৰখা এগৰাকী আমেৰিকান নাগৰিকৰ ওপৰত জাৰি কৰা ভ্ৰমণ নিষেধাজ্ঞা (Travel Ban) প্ৰত্যাহাৰ কৰিছে।
সৌদি বংশোদ্ভূত আমেৰিকাৰ নাগৰিক ছা’দ ইব্ৰাহিম আলমাডী (Saad Ibrahim Almadi)-ক ২০২১ চনত তেওঁৰ নিজৰ দেশ ভ্ৰমণৰ সময়ত গ্ৰেপ্তাৰ কৰা হৈছিল। তেওঁৰ টুইটসমূহত দুৰ্নীতি আৰু সাংবাদিক জামাল খাছোগীৰ হত্যাকাণ্ডৰ বিষয়ে উল্লেখ আছিল। এই টুইটসমূহৰ বাবে তেওঁৰ বিৰুদ্ধে দেশখনক অস্থিতিশীল কৰাৰ অভিযোগত ২০২২ চনত ১৬ বছৰৰ কাৰাদণ্ড বিহা হৈছিল।
আমেৰিকা যুক্তৰাষ্ট্ৰৰ জো বাইডেন চৰকাৰৰ আহ্বানৰ পিছত তেওঁক এবছৰ পিছত মুক্তি দিয়া হৈছিল যদিও দেশ এৰি যোৱাৰ ক্ষেত্ৰত নিষেধাজ্ঞা আৰোপ কৰা হৈছিল। বৰ্তমান, তেওঁৰ পৰিয়ালে নিশ্চিত কৰিছে যে ছৌদি কৰ্তৃপক্ষই তেওঁৰ ওপৰত থকা ভ্ৰমণ নিষেধাজ্ঞা প্ৰত্যাহাৰ কৰিছে আৰু তেওঁ আমেৰিকালৈ উভতি গৈ আছে।
পৰিয়ালটোৱে এক বিবৃতিত ৰাষ্ট্ৰপতি ড’নাল্ড ট্ৰাম্প আৰু তেওঁৰ প্ৰশাসনক তেওঁলোকৰ নিৰন্তৰ প্ৰচেষ্টাৰ বাবে ধন্যবাদ জ্ঞাপন কৰিছে। এই ঘোষণা ছৌদি যুৱৰাজ মহম্মদ বিন ছালমানৰ সৈতে ৰাষ্ট্ৰপতি ট্ৰাম্পৰ উচ্চ-স্তৰীয় বৈঠকৰ পিছতে আহিছে।
