আমেৰিকা যুক্তৰাষ্ট্ৰৰ H-1B ভিছা প্ৰক্ৰিয়াত হোৱা অভূতপূৰ্ব বিলম্ব আৰু জটিলতাই বৰ্তমান হাজাৰ হাজাৰ ভাৰতীয় তথ্য-প্ৰযুক্তি কৰ্মীৰ জীৱনলৈ চৰম অনিশ্চয়তা নমাই আনিছে। শেহতীয়া প্ৰতিবেদন অনুসৰি, আমেৰিকা চৰকাৰে সামাজিক মাধ্যমৰ স্ক্ৰীনিং (Social Media Screening) বাধ্যতামূলক কৰাৰ ফলত ভিছা সাক্ষাৎকাৰৰ সময়সূচী ব্যাপকভাৱে সলনি কৰা হৈছে।
ডিচেম্বৰ মাহৰ বহুতো সাক্ষাৎকাৰ হঠাৎ বাতিল কৰি ২০২৬ চনলৈ পিছুৱাই দিয়া হৈছে। ইয়াৰ ফলত ছুটীত ভাৰতলৈ অহা বহু ভাৰতীয় কৰ্মী এতিয়া দেশতে আৱদ্ধ হৈ পৰিছে।
মাহৰ পিছত মাহ ধৰি আমেৰিকালৈ উভতি যাব নোৱাৰাৰ বাবে বহুতে চাকৰি হেৰুওৱাৰ ভাবুকিৰ সন্মুখীন হৈছে।
বহু ক্ষেত্ৰত স্বামী বা পত্নী আমেৰিকাত থকাৰ বিপৰীতে আনজন সংগী ভাৰতত আৱদ্ধ হৈ পৰাত পৰিয়ালসমূহৰ মাজত হাহাকাৰ সৃষ্টি হৈছে।
ট্ৰাম্প প্ৰশাসনে এইচ-১বি ভিছাৰ নামত অতিৰিক্ত মাচুল (প্ৰায় ১ লাখ ডলাৰ) আৰু কঠোৰ নিয়ম আৰোপ কৰাৰ যি যো-জা চলাইছে, তাৰ ফলত আইটি কোম্পানীসমূহো চিন্তিত হৈ পৰিছে। গুগল আৰু এপলৰ দৰে প্ৰতিষ্ঠানে ইতিমধ্যে নিজৰ কৰ্মচাৰীসকলক বৰ্তমান আন্তঃৰাষ্ট্ৰীয় ভ্ৰমণ নকৰিবলৈ পৰামৰ্শ দিছে।
