উত্তৰ গোৱাৰ আৰ্পোৰা গাঁৱৰ এটা জনপ্ৰিয় নাইটক্লাৱ “Birch by Romeo Lane”-ত যোৱা শনিবাৰে (৬ ডিচেম্বৰ) নিশা সংঘটিত ভয়াৱহ অগ্নিকাণ্ডৰ সৈতে জড়িত থকাৰ সন্দেহত চাৰিজনক গ্ৰেপ্তাৰ কৰা হৈছে। এই দুৰ্ঘটনাত ২৫ জন লোকৰ মৃত্যু হৈছিল, য’ত বেছিভাগেই আছিল ক্লাবটোৰ কৰ্মচাৰী।
আৰক্ষীয়ে নাইটক্লাৱটোৰ সাধাৰণ পৰিচালককে ধৰি চাৰিজন কৰ্মচাৰীক গ্ৰেপ্তাৰ কৰিছে। ক্লাবটোৰ দিল্লীস্থিত মালিক গৌৰৱ আৰু সৌৰভ লুত্ৰাৰ বিৰুদ্ধেও গোচৰ ৰুজু কৰা হৈছে। প্ৰাথমিক অনুসন্ধানত ভৱনটোত অগ্নি নিৰাপত্তা নীতি উলংঘা কৰা হৈছিল বুলি পোহৰলৈ আহিছে।
গোৱাৰ মুখ্যমন্ত্ৰী প্ৰমোদ সাৱন্তে এই দুৰ্ভাগ্যজনক ঘটনাত গভীৰ শোক প্ৰকাশ কৰিছে আৰু মৃতকৰ আত্মীয়লৈ ৫ লাখ টকা আৰু আহতসকললৈ ৫০ হাজাৰ টকাৰ অনুদান (Ex-gratia) ঘোষণা কৰিছে। প্ৰধানমন্ত্ৰী নৰেন্দ্ৰ মোদীয়েও মৃতকৰ পৰিয়াললৈ ২ লাখ টকা আৰু আহতসকললৈ ৫০,০০০ টকাৰ সাহায্য ঘোষণা কৰিছে। মুখ্যমন্ত্ৰীয়ে এই দুৰ্ঘটনাৰ তদন্তৰ নিৰ্দেশ দিছে আৰু এক সপ্তাহৰ ভিতৰত প্ৰতিবেদন দাখিল কৰিবলৈ কৈছে। এই দুৰ্ঘটনাৰ বাবে বৰ্তমানলৈকে তিনিজন চৰকাৰী বিষয়াক নিলম্বিত কৰা হৈছে।
এই মৰ্মান্তিক ঘটনাই ৰাজ্যখনৰ নিশাৰ জীৱনৰ স্থানসমূহৰ নিৰাপত্তা মানদণ্ডক লৈ গুৰুতৰ প্ৰশ্নৰ সৃষ্টি কৰিছে।
