ঘূৰ্ণীবতাহৰ ফলত সৃষ্ট ভয়ংকৰ বানপানী আৰু ভূমিস্খলনে ইণ্ডোনেছিয়াত এক বৃহৎ ট্ৰেজেডীৰ সৃষ্টি কৰিছে। দেশখনৰ কেইবাখনো প্ৰদেশত হোৱা এই দুৰ্যোগত এতিয়ালৈকে কমেও ৯০৮ জন লোকৰ মৃত্যু হোৱাৰ খবৰ পোৱা গৈছে। ইয়াৰ উপৰিও ৪০০ তকৈ অধিক লোক এতিয়াও সন্ধানহীন হৈ আছে, যাৰ ফলত মৃত্যুৰ সংখ্যা বৃদ্ধি পোৱাৰ আশংকা কৰা হৈছে।
এই বানপানীৰ ফলত হাজাৰ হাজাৰ লোক গৃহহীন হৈ পৰিছে আৰু চৰকাৰী তথ্য মতে ৫০,০০০ ৰো অধিক লোকে আশ্ৰয় শিবিৰত থাকিবলৈ বাধ্য হৈছে।
প্ৰচণ্ড বৰষুণ আৰু ঘূৰ্ণীবতাহৰ প্ৰভাৱত ভূমিস্খলনৰ ঘটনাও বৃদ্ধি পাইছে, যিয়ে উদ্ধাৰ অভিযানত বাধাৰ সৃষ্টি কৰিছে। দুৰ্যোগ ব্যৱস্থাপনা সংস্থাসমূহে যুদ্ধকালীন তৎপৰতাৰে উদ্ধাৰ আৰু সাহায্য অভিযান অব্যাহত ৰাখিছে। খাদ্য, খোৱাপানী আৰু চিকিৎসা সেৱাৰ অভাৱে জীয়াই থকা লোকসকলৰ বাবে গুৰুতৰ সমস্যাৰ সৃষ্টি কৰিছে। ইণ্ডোনেছিয়া চৰকাৰে এই বিশাল প্ৰাকৃতিক দুৰ্যোগৰ মোকাবিলা কৰিবলৈ আন্তঃৰাষ্ট্ৰীয় সাহায্যৰ বাবে আহ্বান জনাইছে।
