মুখ্যমন্ত্ৰী ড০ হিমন্ত বিশ্ব শৰ্মা দুদিনীয়া বৰাক উপত্যকা ভ্ৰমণ কাৰ্যসূচীৰে ৬ ডিচেম্বৰ শণিবাৰে শিলচৰলৈ আহিব। এই দুদিনীয়া ভ্ৰমণত মুখ্যমন্ত্ৰীয়ে আজি হাইলাকান্দি আৰু শিলচৰত কেইবাটাও কাৰ্যসূচীত অংশগ্ৰহণ কৰিব। আজি প্ৰথমে শিলচৰত উপস্থিত হৈ হাইলাকান্দিলৈ ৰাওনা হ’ব ড. শৰ্মা। তাত পুৱা ১১:১৫ বজাত হাইলাকান্দি খেলপথাৰত আয়োজিত ‘মুখ্যমন্ত্ৰী মহিলা উদ্যমিতা’ অভিযান আঁচনিৰ অধীনত হিতাধিকাৰীসকলৰ মাজত চেক বিতৰণ কৰিব। ইয়াৰ পিছতে দুপৰীয়া ১:১৫ বজাত কাছাৰৰ ধলাই বিধানসভা সমষ্টিৰ অন্তৰ্গত বৰজালেংগা খেলপথাৰত আয়োজিত ‘মহিলা উদ্যমিতা অভিযান ‘ আঁচনিৰ অধীনত হিতাধিকাৰীসকলৰ মাজত চেক বিতৰণ কৰিব মুখ্যমন্ত্ৰীয়ে।
কাইলৈ অৰ্থাৎ দেওবাৰে পুৱা ১০:৩০ বজাত মুখ্যমন্ত্ৰী ড০ শৰ্মাই বহু প্ৰত্যাশিত শিলচৰৰ মধুৰাঘাট দলঙৰ আধাৰশিলা স্থাপন কৰিব। মন কৰিবলগীয়া যে এই দলং নিৰ্মাণৰ কাম সম্পূৰ্ণ হ’লে বৃহত্তৰ মধুৰাকে ধৰি আশে-পাশে থকা অঞ্চলৰ সৈতে আন্তঃজিলা যোগাযোগ ব্যৱস্থা ক্ষিপ্ৰ হ’ব। আধাৰশিলা স্থাপনৰ অন্তত পুৱা ১১:৩০ বজাত জিলাৰ উধাৰবন্দ ডিএনএইচএছ খেলপথাৰত মুখ্যমন্ত্ৰী মহিলা উদ্যমিতা আঁচনিৰ অধীনত হিতাধিকাৰীসকলৰ মাজত চেক বিতৰণ কৰিব মুখ্যমন্ত্ৰীয়ে। অনুষ্ঠানৰ অন্তত মুখ্যমন্ত্রী গুৱাহাটীলৈ উভতি যাব।
