অষ্ট্ৰেলিয়া চৰকাৰে ১৬ বছৰৰ তলৰ শিশুসকলৰ বাবে ছ’চিয়েল মিডিয়া নিষিদ্ধ কৰাৰ যি কঠোৰ আইন প্ৰণয়ন কৰিবলৈ গৈ আছে, তাৰ প্ৰস্তুতি স্বৰূপে মেটা (ফেচবুক আৰু ইনষ্টাগ্ৰামৰ স্বত্বাধিকাৰী কোম্পানী) য়ে ব্যৱস্থা গ্ৰহণ আৰম্ভ কৰিছে। মেটাই ইতিমধ্যে অষ্ট্ৰেলিয়াৰ ১৬ বছৰৰ তলৰ ব্যৱহাৰকাৰীসকললৈ জাননী প্ৰেৰণ কৰিছে যে তেওঁলোকৰ একাউণ্টসমূহ অতি সোনকালে নিষ্ক্ৰিয় বা বন্ধ কৰি দিয়া হ’ব।
অষ্ট্ৰেলিয়াৰ চৰকাৰে শিশুৰ মানসিক স্বাস্থ্য সুৰক্ষাৰ স্বাৰ্থত এই পদক্ষেপ গ্ৰহণ কৰিছে। প্ৰধানমন্ত্ৰী এন্থনি আলবানিজে কৈছে যে ছ’চিয়েল মিডিয়াই শিশুসকলৰ ওপৰত কুপ্ৰভাৱ পেলাইছে আৰু সেয়েহে এই নিষেধাজ্ঞা জৰুৰী। নতুন আইন অনুসৰি, ছ’চিয়েল মিডিয়া প্লেটফৰ্মসমূহে বয়স নিৰ্ধাৰণৰ বাবে কঠোৰ ব্যৱস্থা গ্ৰহণ কৰিব লাগিব, অন্যথা তেওঁলোকে বৃহৎ জৰিমনাৰ সন্মুখীন হ’ব।
মেটাই জনাইছে যে তেওঁলোকে চৰকাৰী নিৰ্দেশনা মানি চলিবলৈ প্ৰতিশ্ৰুতিবদ্ধ। এই নিষেধাজ্ঞাৰ ফলত হাজাৰ হাজাৰ কিশোৰ-কিশোৰীয়ে তেওঁলোকৰ ডিজিটেল সংযোগ হেৰুৱাব লগা হ’ব পাৰে। কিছুমান বিশেষজ্ঞই এই পদক্ষেপক আদৰণি জনাইছে যদিও, আন কিছুমানে যুক্তি দৰ্শাইছে যে ই শিশুসকলক প্ৰযুক্তিৰ পৰা দূৰত ৰাখিব আৰু তেওঁলোকে লুকুৱাই ছ’চিয়েল মিডিয়া ব্যৱহাৰ কৰাৰ প্ৰৱণতা বৃদ্ধি পাব পাৰে।
