উত্তৰ কোৰিয়াই দুটা অত্যাধুনিক দীৰ্ঘ দূৰত্বৰ কৌশলগত ক্ৰুজ মিছাইল (Long-range Strategic Cruise Missiles) সফলতাৰে পৰীক্ষা কৰি নিজৰ পাৰমাণৱিক যুদ্ধ সক্ষমতা প্ৰদৰ্শন কৰিছে। এই পৰীক্ষণৰ জৰিয়তে পিয়ংইয়াঙে আঞ্চলিক উত্তেজনাৰ মাজতে নিজৰ প্ৰতিৰক্ষা শক্তিক অধিক সুদৃঢ় কৰাৰ ইংগিত দিছে।
উত্তৰ কোৰিয়াৰ চৰকাৰী সংবাদ মাধ্যম (KCNA)-ৰ মতে, মিছাইল দুটাই প্ৰায় ২ ঘণ্টা ৫০ মিনিট (১০,২০০ ছেকেণ্ডতকৈ অধিক) উৰণ সম্পন্ন কৰি নিৰ্ধাৰিত লক্ষ্যত আঘাত হানিবলৈ সক্ষম হয়। এই মিছাইলবোৰ পীত সাগৰৰ (Yellow Sea) ওপৰেৰে এক নিৰ্দিষ্ট কক্ষপথেৰে উৰুৱাই দিয়া হৈছিল।
দেশখনৰ শীৰ্ষ নেতা কিম জং উনে নিজেই এই পৰীক্ষণ পৰ্যবেক্ষণ কৰে। তেওঁ এই ফলাফলক লৈ সন্তোষ প্ৰকাশ কৰি কয় যে দেশৰ পাৰমাণৱিক সামৰিক শক্তিৰ “অসীমিত আৰু অবিৰত উন্নয়ন” অব্যাহত থাকিব।
এই ড্ৰিলৰ মুখ্য উদ্দেশ্য আছিল দীৰ্ঘ দূৰত্বৰ মিছাইল গোটসমূহৰ প্ৰতি-আক্ৰমণ ক্ষমতা আৰু যুদ্ধৰ বাবে সাজু থকাৰ স্থিতি (Combat Readiness) পৰীক্ষা কৰা।
দক্ষিণ কোৰিয়াৰ সামৰিক বাহিনীয়ে পিয়ংইয়াঙৰ ওচৰৰ সুনান অঞ্চলৰ পৰা এই উৎক্ষেপণ ধৰা পেলাইছে। এই পৰীক্ষাক আমেৰিকা আৰু দক্ষিণ কোৰিয়াৰ বৰ্ধিত সামৰিক তৎপৰতাৰ বিৰুদ্ধে এক প্ৰত্যাহ্বান হিচাপে গণ্য কৰা হৈছে।
বিশ্লেষকসকলৰ মতে, এই ক্ৰোজমিছাইলসমূহ নিম্ন উচ্চতাৰে উৰি যাব পৰা বাবে ৰাডাৰত ধৰা পেলোৱাটো কঠিন, যিটোৱে চুবুৰীয়া দেশসমূহৰ বাবে নতুন নিৰাপত্তা শংকাৰ সৃষ্টি কৰিছে।
