নাইজেৰিয়াৰ উত্তৰ-পূব প্ৰান্তৰ মেইডুগুৰি চহৰত এটা মছজিদত সংঘটিত এক শক্তিশালী বিস্ফোৰণে সমগ্ৰ অঞ্চলটো কঁপাই তুলিছে। মছজিদটোত নামাজ পঢ়ি থকাৰ সময়তে হোৱা এই বিস্ফোৰণৰ ফলত থিতাতে অতি কমেও ৭ জন লোকৰ মৃত্যু হোৱাৰ লগতে কেইবাজনো গুৰুতৰভাৱে আহত হৈছে।
স্থানীয় সূত্ৰৰ মতে, একাংশ লোকে মছজিদত প্ৰাৰ্থনা কৰি থকাৰ সময়তে এই আকস্মিক বিস্ফোৰণটো সংঘটিত হয়। বিস্ফোৰণৰ ফলত মছজিদটোৰ বৃহৎ অংশ ক্ষতিগ্ৰস্ত হৈছে। ঘটনাৰ খবৰ পোৱাৰ লগে লগে উদ্ধাৰকাৰী দল আৰু আৰক্ষী বাহিনী উপস্থিত হৈ আহতসকলক নিকটৱৰ্তী চিকিৎসালয়লৈ প্ৰেৰণ কৰে।
উল্লেখ্য যে, মেইডুগুৰি অঞ্চলটো দীৰ্ঘদিন ধৰি সন্ত্ৰাসবাদী কাৰ্যকলাপৰ বাবে অশান্ত হৈ আছে। যদিও এই পৰ্যন্ত কোনো গোটে এই ঘটনাৰ দায়িত্ব স্বীকাৰ কৰা নাই, তথাপিও স্থানীয় প্ৰশাসনে ইয়াৰ আঁৰত কোনো উগ্ৰপন্থী গোটৰ হাত থকাৰ সন্দেহ প্ৰকাশ কৰিছে। বৰ্তমান অঞ্চলটোত নিৰাপত্তা ব্যৱস্থা কটকটীয়া কৰা হৈছে আৰু তদন্ত অব্যাহত আছে।
