ছ’চিয়েল মিডিয়াৰ নিয়ম ভংগৰ অভিযোগ: প্ৰাক্তন ইউৰোপীয় আয়ুক্তক ভিছা অস্বীকাৰ আমেৰিকাৰ

আমেৰিকা যুক্তৰাষ্ট্ৰৰ বৈদেশিক পৰিক্ৰমা দপ্তৰে মঙলবাৰে ঘোষণা কৰে যে ইউৰোপীয় ইউনিয়নৰ প্ৰাক্তন আয়ুক্ত থিয়েৰী ব্ৰেটন (Thierry Breton) আৰু আন চাৰিজন ব্যক্তিক দেশখনত প্ৰৱেশৰ বাবে ভিছা প্ৰদান কৰা নহ’ব। আমেৰিকাৰ অভিযোগ অনুসৰি, এই ব্যক্তিসকলে আমেৰিকাৰ ছ’চিয়েল মিডিয়া প্লেটফৰ্মসমূহক তেওঁলোকৰ বিৰোধী মতাদৰ্শ চেন্সৰ কৰিবলৈ বাধ্য কৰাইছিল।

আমেৰিকাৰ বৈদেশিক সচিব মাৰ্কো ৰুবিঅ’ই এক বিবৃতিত কয় যে এই “চৰমপন্থী সক্ৰিয় কৰ্মী” আৰু একাংশ বেচৰকাৰী সংস্থাই (NGO) বাক-স্বাধীনতাৰ ওপৰত আঘাত হানিছে। বিশেষকৈ থিয়েৰী ব্ৰেটনক ইউৰোপীয় ইউনিয়নৰ ‘ডিজিটেল চাৰ্ভিচেছ এক্ট’ (DSA)ৰ মূল পৰিকল্পনাকাৰী হিচাপে গণ্য কৰা হয়। এই আইনখনৰ জৰিয়তে ছ’চিয়েল মিডিয়া কোম্পানীসমূহক বিষয়বস্তু পৰীক্ষণ (Content Moderation)ৰ বাবে হেঁচা দিয়াৰ অভিযোগ উত্থাপন হৈছে, যাক আমেৰিকাৰ সোঁপন্থী ৰাজনীতিবিদসকলে বাক-স্বাধীনতাৰ বিৰুদ্ধে এক অস্ত্ৰ হিচাপে গণ্য কৰে।

ইপিনে, থিয়েৰী ব্ৰেটনে এই নিষেধাজ্ঞাক এক “ডাইনী চিকাৰ” (Witch hunt) বুলি অভিহিত কৰিছে। তেওঁ কয় যে ইউৰোপৰ আইনসমূহ গণতান্ত্ৰিকভাৱে গৃহীত কৰা হৈছে আৰু ই আমেৰিকাৰ সাৰ্বভৌমত্বত কোনো হস্তক্ষেপ কৰা নাই।