নতুন দিল্লীস্থিত বাংলাদেশ উচ্চায়ুক্তই সোমবাৰে (২২ ডিচেম্বৰ) এক জৰুৰী জাননীযোগে তেওঁলোকৰ সকলো ধৰণৰ কনছুলাৰ আৰু ভিছা সেৱা অনিৰ্দিষ্টকালৰ বাবে স্থগিত ৰখাৰ কথা ঘোষণা কৰিছে।
উচ্চায়ুক্তৰ বাহিৰত আঁৰি দিয়া জাননীখনত এই স্থগিতকৰণৰ বাবে “অনিবার্য পৰিস্থিতি” (Unavoidable Circumstances) ক দায়ী কৰা হৈছে। উল্লেখযোগ্য যে বিগত কেইদিনমানত বাংলাদেশত সংখ্যালঘুসকলৰ ওপৰত চলা অত্যাচাৰ আৰু এজন হিন্দু যুৱকৰ হত্যাকাণ্ডৰ প্ৰতিবাদত নতুন দিল্লীৰ বাংলাদেশ মিছনৰ বাহিৰত হিন্দুত্ববাদী সংগঠনসমূহে তীব্ৰ প্ৰতিবাদ সাব্যস্ত কৰিছিল।
বাংলাদেশ চৰকাৰৰ মতে, এই প্ৰতিবাদৰ বাবে তেওঁলোকৰ কূটনৈতিক বিষয়া আৰু পৰিয়ালবৰ্গই নিৰাপত্তাহীনতাত ভুগিছে, যাৰ বাবে এই পদক্ষেপ গ্ৰহণ কৰা হৈছে।
ভাৰতৰ বৈদেশিক মন্ত্ৰালয়ে (MEA) স্পষ্ট কৰি দিছে যে দিল্লীত থকা বাংলাদেশ উচ্চায়ুক্তৰ নিৰাপত্তা সুনিশ্চিত কৰিবলৈ পৰ্যাপ্ত আৰক্ষী মোতায়েন কৰা হৈছে। বাংলাদেশে কৰা “নিৰাপত্তাৰ অভাৱ”ৰ দাবীক ভাৰতে “বিভ্ৰান্তিকৰ প্ৰচাৰ” বুলি অভিহিত কৰিছে। তথাপিও, ভাৰতে বৰ্তমানলৈকে বাংলাদেশৰ নাগৰিকসকলৰ বাবে (বিশেষকৈ চিকিৎসাৰ বাবে) ভিছা সেৱা সম্পূৰ্ণৰূপে বন্ধ কৰা নাই।
