ইণ্ডোনেছিয়াৰ ৰাজধানী জাকাৰ্টাৰ কেন্দ্ৰীয় অঞ্চলত থকা এটা কাৰ্যালয় ভৱনত মঙ্গলবাৰে সংঘটিত এক ভয়ংকৰ অগ্নিকাণ্ডত কমেও ২২ জন লোকে কৰুণ মৃত্যুক সাৱটি লয়। নিহতসকলৰ ভিতৰত এগৰাকী গৰ্ভৱতী মহিলাও আছে বুলি প্ৰকাশ পাইছে।
এই অগ্নিকাণ্ডত অতি কম সময়ৰ ভিতৰতে জুইয়ে ভৱনটোৰ কেইবাটাও মহলাত বিয়পি পৰে। প্ৰাৰম্ভিক তদন্ত অনুসৰি, জুই লগাৰ কাৰণ হিচাপে ড্ৰ’নৰ বেটাৰী বিস্ফোৰণক সন্দেহ কৰা হৈছে।
উদ্ধাৰকাৰী দল আৰু অগ্নিনিৰ্বাপক বাহিনীয়ে ততাতৈয়াকৈ ঘটনাস্থলীত উপস্থিত হৈ উদ্ধাৰ অভিযান চলায়। জাকাৰ্টা আৰক্ষীৰ মুখপাত্ৰই জনোৱা অনুসৰি, মৃত ২২ জন লোকৰ বেছিভাগেই ঘন ক’লা ধোঁৱাৰ বাবে উশাহ-নিশাহ বন্ধ হৈ মৃত্যু মুখত পৰে। সংকটজনক অৱস্থাত কেইবাজনো আহত লোকক চিকিৎসাৰ বাবে চিকিৎসালয়লৈ প্ৰেৰণ কৰা হয়।
এই শোকাৱহ ঘটনাক কেন্দ্ৰ কৰি বৰ্তমান আৰক্ষী আৰু সংশ্লিষ্ট বিভাগে এক উচ্চ পৰ্যায়ৰ তদন্ত আৰম্ভ কৰিছে।
