ৰাছিয়াৰ ৰাষ্ট্ৰপতি ভ্লাদিমিৰ পুটিনে ভাৰত আৰু ৰাছিয়াৰ মাজৰ গভীৰ কৌশলগত অংশীদাৰিত্ব সন্দৰ্ভত এক গুৰুত্বপূৰ্ণ মন্তব্য কৰিছে। তেওঁ স্পষ্টকৈ কয় যে দুয়োখন দেশৰ মাজত চলি থকা সহযোগিতা কোনো তৃতীয় দেশক লক্ষ্য কৰি লোৱা হোৱা নাই, বৰঞ্চ ই কেৱল দুয়োপক্ষৰ ৰাষ্ট্ৰীয় স্বাৰ্থ সুৰক্ষিত কৰাৰ বাবেহে।
এক উচ্চ পৰ্যায়ৰ বৈঠকৰ পাছত প্ৰদান কৰা এক বিবৃতিত ৰাষ্ট্ৰপতি পুটিনে এই কথা উল্লেখ কৰে। তেওঁ কয়, “ভাৰত আৰু ৰাছিয়াৰ অংশীদাৰিত্ব সম্পূৰ্ণৰূপে উন্মুক্ত আৰু স্বতন্ত্ৰ। আমাৰ লক্ষ্য হৈছে পাৰস্পৰিক নিৰাপত্তা, অৰ্থনৈতিক বিকাশ আৰু জনসাধাৰণৰ কল্যাণ নিশ্চিত কৰা।”
ভাৰতে ৰাছিয়াৰ পৰা বৃহৎ পৰিমাণৰ অত্যাধুনিক সামৰিক সঁজুলি ক্ৰয় কৰা আৰু আন্তঃৰাষ্ট্ৰীয় মঞ্চত দুয়োখন দেশে বহু ক্ষেত্ৰত একেলগে কাম কৰাক লৈ আমেৰিকা আৰু ইউৰোপৰ পৰা সমালোচনা আহি থকাৰ মাজতে পুটিনৰ এই মন্তব্যই বিশেষ গুৰুত্ব লাভ কৰিছে। ৰাছিয়াৰ ৰাষ্ট্ৰপতিয়ে দুয়োখন দেশৰ মাজত বিশেষকৈ শক্তি, প্ৰতিৰক্ষা আৰু মহাকাশ গৱেষণাৰ ক্ষেত্ৰত সম্পৰ্ক অধিক শক্তিশালী হ’ব বুলিও আশা ব্যক্ত কৰে।
