ঘূৰ্ণীবতাহ ‘দিত্বাহে’ (Cyclone Ditwah) শ্ৰীলংকাত কৰা তাণ্ডৱৰ পাছত দেশখনত পৰিস্থিতি অধিক ভয়াৱহ হৈ পৰিছে। এই প্ৰাকৃতিক দুৰ্যোগত মৃতকৰ সংখ্যা এতিয়ালৈকে ৩৩০ জন অতিক্ৰম কৰিছে আৰু আন বহু লোক এতিয়াও সন্ধানহীন হৈ আছে। ব্যাপকভাৱে ক্ষতিগ্ৰস্ত হোৱা শ্ৰীলংকাত উদ্ধাৰ অভিযানত সহায় কৰিবলৈ ভাৰতে ততাতৈয়াকৈ জাহাজ আৰু বিশেষ সাহায্য দল প্ৰেৰণ কৰিছে।
ভাৰতীয় নৌসেনা আৰু উপকূলৰক্ষী বাহিনীৰ কেইবাখনো জাহাজ খাদ্য, ঔষধ আৰু জৰুৰীকালীন সাহায্য সামগ্ৰী লৈ শ্ৰীলংকাৰ ক্ষতিগ্ৰস্ত উপকূলীয় অঞ্চলসমূহলৈ ৰাওনা হৈছে। উদ্ধাৰ অভিযানত সহায় কৰিবলৈ ভাৰতৰ ৰাষ্ট্ৰীয় দুৰ্যোগ সঁহাৰি বাহিনীৰ (NDRF) বিশেষ দলকো মোতায়েন কৰা হৈছে। এই দুৰ্যোগত হাজাৰ হাজাৰ লোক গৃহহীন হৈ পৰিছে আৰু দেশৰ আন্তঃগাঁথনি গুৰুতৰভাৱে ক্ষতিগ্ৰস্ত হৈছে।
শ্ৰীলংকাৰ ৰাষ্ট্ৰপতিয়ে ভাৰতৰ জৰুৰীকালীন সহায়ৰ বাবে কৃতজ্ঞতা প্ৰকাশ কৰিছে। ঘূৰ্ণীবতাহৰ ফলত হোৱা বানপানী আৰু ভূমিস্খলনৰ ফলত যোগাযোগ ব্যৱস্থা ব্যাহত হোৱাত উদ্ধাৰ অভিযানত প্ৰতিকূলতা আহিছে। আন্তঃৰাষ্ট্ৰীয় সাহায্য সংস্থাসমূহেও এই দুৰ্যোগৰ মোকাবিলা কৰিবলৈ সহায়ৰ হাত আগবঢ়াইছে।
