ৰাছিয়া আৰু ইউক্ৰেইনৰ মাজত চলি থকা যুদ্ধই এক ভয়ংকৰ ৰূপ ধাৰণ কৰিছে। ৰাছিয়াৰ ৰাষ্ট্ৰপতি ভ্লাদিমিৰ (Vladimir Putin) পুটিনে নিশ্চিত কৰিছে যে তেওঁৰ দেশে ইউক্ৰেইনৰ নিপ্ৰ’ চহৰত এক নতুন ধৰণৰ হাইপাৰছনিক বেলিষ্টিক মিছাইল নিক্ষেপ কৰিছে। এই মিছাইলটোৰ নাম ‘অৰেশ্নিক’ (Oreshnik) বুলি জনা গৈছে। শেহতীয়াকৈ ইউক্ৰেইনে আমেৰিকা আৰু ব্ৰিটেইনৰ দ্বাৰা যোগান ধৰা দীৰ্ঘদূৰত্বৰ মিছাইল ৰাছিয়াৰ ভূখণ্ডত ব্যৱহাৰ কৰাৰ প্ৰতিশোধ স্বৰূপে ৰাছিয়াই এই আক্ৰমণ চলাইছে।
পুটিনে এক টেলিভিছন ভাষণত কয় যে এই নতুন মিছাইলটোৱে শব্দৰ বেগতকৈ ১০ গুণ অধিক বেগত উৰিব পাৰে আৰু বৰ্তমানৰ কোনো আকাশী প্ৰতিৰক্ষা ব্যৱস্থাই ইয়াক বাধা দিব নোৱাৰে। যদিও এইবাৰ মিছাইলটোত পাৰমাণৱিক অস্ত্ৰ ব্যৱহাৰ কৰা হোৱা নাছিল, ইয়াৰ ধ্বংস ক্ষমতা অতিশয় ভয়াৱহ। এই আক্ৰমণক পশ্চিমীয়া দেশসমূহৰ বাবে এক সতৰ্কবাণী বুলি অভিহিত কৰা হৈছে।
ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে এই ঘটনাক যুদ্ধৰ এক গুৰুতৰ সম্প্ৰসাৰণ বুলি উল্লেখ কৰিছে আৰু বিশ্ব সম্প্ৰদায়ক ৰাছিয়াৰ ওপৰত অধিক কঠোৰ হবলৈ আহ্বান জনাইছে। এই নতুন অস্ত্ৰৰ ব্যৱহাৰে ইউৰোপৰ নিৰাপত্তা ব্যৱস্থাত নতুনকৈ চিন্তাৰ উদ্ৰেক কৰিছে আৰু যুদ্ধখন পাৰমাণৱিক পৰ্যায়লৈ গতি কৰাৰ আশংকা বৃদ্ধি কৰিছে।
