ইউক্রেইনত চলি থকা যুদ্ধ সমাপ্ত কৰাৰ বাবে আমেৰিকা যুক্তৰাষ্ট্ৰই (US) এক নতুন শান্তি পৰিকল্পনাৰ খচৰা যুগুত কৰাৰ খবৰ পোৱা গৈছে। এই পৰিকল্পনা সম্পৰ্কে তথ্য থকা এজন জ্যেষ্ঠ বিষয়াই ফ্ৰান্স-প্ৰেছ এজেঞ্চী (AFP)-ক জনোৱা অনুসৰি, এই প্ৰস্তাৱত কিয়েভক ৰাছিয়াৰ নিয়ন্ত্ৰণত থকা ভূমি এৰি দিয়া আৰু নিজৰ সেনাৰ আকাৰ আধা কৰিবলৈ কোৱা হৈছে।
বাতৰি অনুসৰি, এই ২৮-দফীয়া পৰিকল্পনাটো আমেৰিকাৰ বিশেষ দূত ষ্টিভ উইটকফ আৰু ৰাছিয়াৰ আলোচক কিৰিল ডিমিট্ৰিভৰ মাজত হোৱা আলোচনাৰ অন্তত যুগুত কৰা হৈছে। এই খচৰাত ক্ৰিমিয়াক ৰাছিয়াৰ অঞ্চল হিচাপে স্বীকৃতি দিয়া আৰু ইউক্রেইনৰ সৈন্যক ৪,০০,০০০ লৈ হ্ৰাস কৰাৰ ব্যৱস্থা আছে। ইয়াৰ উপৰিও, ইউক্রেইনে দীৰ্ঘ দূৰত্বৰ অস্ত্ৰ-শস্ত্ৰ ত্যাগ কৰিব লাগিব।
অৱশ্যে, ইউক্রেইনৰ বিষয়াসকলে এই পৰিকল্পনাক ‘গ্ৰহণযোগ্য নহয়’ বুলি অভিহিত কৰিছে, কিয়নো ই ক্ৰেমলিনৰ সৰ্বাধিক দাবীসমূহৰ সৈতে একে। তেওঁলোকে সঁকীয়নি দিছে যে তেওঁলোকে কোনো কাৰণতে নিজৰ ভূখণ্ড এৰি নিদিয়ে। আমেৰিকাৰ সেনাবিভাগৰ সচিব ডেন ড্ৰিস্কলে শান্তি আলোচনাৰ প্ৰচেষ্টা পুনৰ আৰম্ভ কৰিবলৈ কিয়েভ ভ্ৰমণ কৰাৰ সময়তে এই খবৰটো প্ৰকাশ পাইছে।
